ماقبل السفر

السلام عليكم ورحمة الله،
اسمي ريم عمري ١٤ أحب السفر وتعلم ثقافات دول مختلفه

ان شاء الله هذا البلوق حيكون عن صيف ٢٠١٣ وايش سويت.. رحلتي كانت في ٨ جون ورجعت الرياض في ٢٨ مريت على ثلاث دول اوروبيه والحمدالله 3>

نبدا الحين نتكلم عن ماقبل السفر < أحس اسلوبي رسمي معرف ليه !

كالعاده قبل السفر لازم الحجز قبل بفتره حجزنا قبل السفر بثلاث اشهر طبعاً بحكم اني صغيرة ومو اهتماماتي الحجز فما شاركت في هذي النقطه..
نجي لاصدار الفيزا طبعاً ماشاء الله علينا ماستوعبنا نحجز الا قبل السفر ب ١٥ يوم يعني لو ماطلعت الفيزا ممكن مانسافر !!
للاسف انو اهلي حجزوا موعد عند السفاره في اليوم اللي كان عندي اختبار -التحصيلي اللي ازعجونا فيه الوزاره حق ثالث متوسط ><- طبعاً ماكنت اعرف عن الاختبار ولا شي بيدخل بالنسبه او لا الله اعلم كنت خايفه،المهم نزلت الادارة -كان يوم اربعاء والموعد حقي الاثنين والاختبار ثلاث ايام احد اثنين ثلاثاء- بقول لهم اني ماقدر اجي الاختبار قعدوا يطالعوني باستحقار قالوا ليه ماكنت الصراحه ابي اقول اني بسافر وعندي موعد في السفاره قلت عندي موعد وجت وحده من الاستاذات كنت قد قلت لها انه عندي موعد جت قالت ايه ريم عندها موعد في المستشفى انا طالعتها قلت لا لا موعد بالسفاره قالوا ليه تقولين طيب مستشفى قلت انا ماقلت الا موعد انتم طلعتوا المستشفى من بطنكم طالعتني المديرة باستحقار قالت وش اهم الدراسه ولا السفر في قررات نفسي اكيد السفر بس قلت كلهم قالت طيب خلاص اجلي موعدك وذيك الفتره مستحيل نلاقي موعد من الزحمه قلت ماقدر ويعني لو مارحت اهلي كلهم ماراح يروحون وقمت افلم عليها وقالوا لك حل واحد روحي التوجيه وقولي لهم انك ماتقدرين تختبرين وقعدت اصيح لدرجة المدرسة كلها عرفت اني بسافر xD المهم سوينا حفلة بكاء وسحبت على الادارة رجعت البيت وقمت اصيح واختي عصبت علي اني ماقلت لها قبل، السفاره كان عندهم خدمه انو تدفع ١٥٠ وتدخل vip قلت خلاص مافيه الا نسوي كذا دقينا عليهم نتاكد قالوا لا مافيه وصارت حفلة بكاء ثانيه قلت انا واختي مافيه الا نروح السفارة السبت بس ..

السبت كان عندي اختبار حاسب عملي  نهائي يقطع ام الوهقه قلت انو خلاص اروح اختبر واطلع السفاره كانت تفتح ٩ ومن حسن حظي اختبرت اول وحده ورحت انا واختي للسفاره-كنت احاول اغير مريولي بالسياره بس ماقدرت ورحت بالمريول p;- المهم يوم دخلنا السفاره ز ح م ه وقلت مستحيل ندخل بس صارت الزحمه على حق الرجال المهم رحنا اخذنا لنا رقم لل vip وقلنا انو لشخص واحد اللي هو انا، رحنا نبي ندخل عشان نقدم اوراقنا قالوا مايدخل الا شخص واحد واختي مستحيل تخليني وحدي لاني مادبر شي رحنا توزينا وكتبنا على الورقه اثنين بس انبنا ظميرنا رجعنا عند الرسبشن وقلنا نبي اثنين راح كتب اثنين المهم دخلنا وجلسنا مكان ال vip وقمنا ننتظر يمكن ساعه واختي تقول خايفه انو الاوراق مو كامله ومدري وشو قلت لا تخافين ان شاء الله كل شي يصير كويس والحمدالله صارت اوراقنا كامله وكل شي جا وقت التبصيم والتصوير دخلنا كان اللي يصور هندي عاد من الفرحه اني خلصت وانا اصور ابتسمت عكس جوازي صورتي معصبه عشان الهيبه وكذا xD وقال ممكن تطلع خلال خمس ثمان ايام يعني ان شاء الله قبل نسافر..

المهم يوم خلصنا اختي كان عندها اختبار بالجامعه الساعة ١١ والحين ١٠ ونص وقعدنا ننتظر بابا يجي عشان اروح معاه تاخر قالت خلاص انا بروح مع السواق وانتِ خذي جوالك وانتظريه انا قلت خير والله مانتظر عند ذا الهنود قالت ماعلي المشكله الجوال ماكان فيه شاحن ونشبت فيها لين جا بعد تبي تخليني لوحدي -.-

ويوم الاثنين عاد راحوا اهلي، كنت خايفه يطلع جوازي ولا تطلع جوازات اهلي او العكس .. المهم بعد كم يوم قالوا تعالوا خذوا جوازاتكم الحمدالله *,*